Chapter (120)
ယွမ်ယန်ကျင့်စဥ်၏ ပထမအဆင့်
အန်းရွှိထောင်းကို တစ်ချက်တည်း အနိုင်ယူသွားတာကို ကြည့်ပြီး လုရွှမ်အား ရိုင်းစိုင်းတဲ့ စကားလုံးတွေ ပြောခဲ့တဲ့ ရှဲ့ကျားဟာ မနေနိုင်လောက်အောင် တုန်လှုပ်ခြောက်ခြားသွားသည်။
သူသည် အန်းရွှိထောင်းနဲ့ တစ်ခါမှ မတိုက်ဖူးပေမယ့် သူက ၎င်းရဲ့ ပြိုင်ဘက်မဟုတ်မှန်း သေချာသိပါ၏။
ဒီလို သန်မာတဲ့လူကို သူတကယ်ကို စိန်ခေါ်ခဲ့မိတာပါလား...
ပူပြင်းသော နွေရာသီ ဖြစ်သော်လည်း ရှဲ့ကျားသည် သူ့နောက်ကျောတွင် ချွေးအေးများ စီးကျလာသလို ခံစားလိုက်ပြီး တစ်ကိုယ်လုံး အေးစက်သွားသည်။
"ဒီကောင်လေးက ဘယ်လိုလုပ် ဒီလောက်တောင် သန်မာနိုင်ရတာလဲ"
မင်းသမီးလော့ရုံ၏ အသံသည် အံ့အားသင့်စွာဖြင့် ထွက်ပေါ်လာကာ မျက်လုံးများလည်း ဝိုင်းစက်သွားသည်။
လုရွှမ်သည် အံ့သြဖွယ်ရာများစွာကို ဖန်တီးခဲ့ကြောင်း သူသိသော်လည်း သူ့မျက်လုံးများနှင့် အံ့သြဖွယ်ရာ အသစ်များ မွေးဖွားလာသည်ကို မြင်လိုက်ရသည့်အခါ အံ့သြပြီး မယုံနိုင်လောက်အောင် ဖြစ်နေတော့သည်။
"အစ်ကိုရှန့် ဒီပြိုင်ပွဲပြီးရင် ကျွန်တော်သူနဲ့ပြိုင်မယ်...စဥ်းစားမိထားတဲ့ နည်းလမ်းရှိလား"
အန်းဝူအကယ်ဒမီ၏ ကျောင်းသားများ ထိုင်ရာနေရာ၌ ပထမပွဲတွင် အနိုင်ရခဲ့သော ယန်ယီးသည် သူ့ရှေ့မှ လူငယ်တစ်ဦးကို စိုးရိမ်တကြီးကြည့်နေသည်။
ဒီလူငယ်ဟာ သူနဲ့ အသက်အရွယ် တူပေမယ့် ပိုပြင်းထန်တဲ့ အရှိန်အဟုန်နဲ့ ပိုတည်ငြိမ်တဲ့ အပြုအမူကို ထုတ်ဖော် ပြသနေ၏။
ယန်ယီးသည် ကိုးဦးထဲက တစ်ဦး ဖြစ်သော်လည်း သူ့ရှေ့တွင်ရှိသော အန်းရွှိထောင်းသည် အရိုက်ခံခဲ့ရပြီ။ ထိုလူငယ်ကို အနိုင်ရမယ်လို့ သူအာမ မခံနိုင်တော့ပေ။
"အဲဒီကောင်လေး စစ်မှန်တဲ့ ဝိညာဥ်ချီက ဘယ်လိုပဲဖြစ်ဖြစ် သူ့ရဲ့ ကြံ့ခိုင်မှုကတော့ သိပ်မကောင်းပါဘူး....ခန့်မှန်းရရင် သူ့မှာ အနည်းဆုံး ခွန်အား၅၀၀ လောက်ပဲ ရှိတယ်!"
