Chapter (78)
ဝိုင်းထားပြီ
ဝုန်း....ဝုန်း....ဝုန်း....
ပြတ်သားသောအသံ သုံးသံ ဆက်တိုက်ကြားရပြီး အရိုးများ ကွဲအက်သွားသည့် အသံနှင့်အတူ အရှိန်ပြင်းပြင်းဖြင့် ကျားသစ်ကြီးသည် မြေပြင်ပေါ်တွင် လဲလျောင်းနေပြီး အသက်မရှူတော့ပေ။
"အဆင့်၅ သားရဲ....နဂါးဆင်ရွှေလက်ဝါးရဲ့ ပထမအဆင့်က နောက်ဆုံးတော့ ပြည့်စုံသွားပြီ!"
လုရွှမ်သည် နန်းတော်ပင်လယ် နယ်ပယ်သို့ အောင်မြင်စွာ ရောက်ရှိခဲ့သည်မှာ နောက်ထပ်ငါးရက်ပင် ရှိပြီဖြစ်သည်။ ဤငါးရက်တာ ကာလအတွင်း သူသည် ချိုင့်နက်ထဲသို့ ဆက်လက်ထွက်ခွာသွားခဲ့သည်။
ဤဝမ့်ဖုန်းချိုင့်ဝှမ်းသည် တကယ်ကို အစွမ်းထက်သည်။ ပိုဝင်လေလေ ဝိညာဥ်စွမ်းအင်တွေက အားကောင်းလေဖြစ်ပြီး သားရဲတွေကလည်း အဆင့်မြင့်လေ ဖြစ်သည်။
ဒုတိယနေ့တွင် ရှားပါးသော အဆင့်၅ သားရဲများစွာကို တွေ့ရသည်။
လုရွှမ် ရပ်တန့်လိုက်သည်။
အဆင့်၅သားရဲသည် ဖိရွှယ်နယ်ပယ်ရှိ သန်မာသောလူနှင့် ညီမျှသည်။ သူကအခု ဝူအဆင့်၄ နန်းတော်ပင်လယ် နယ်ပယ်ရှိ လူဖြစ်လို့ တိုက်ပွဲအခြေအနေတွင် အနည်းငယ် ရုန်းကန်နေရဆဲ ဖြစ်လေ၏။
အဆင့်ငါးရှိ မျက်နှာဖြူ ကျားတစ်ကောင်နှင့် တိုက်ခိုက်ပြီး တစ်နာရီနီးပါး ကြာပြီးနောက် လုရွှမ်သည် ပထမအဆင့် နန်းတော်ပင်လယ်၏ စစ်မှန်သော စွမ်းအင်ကို အားကိုးခြင်းဖြင့် ၎င်းကို သတ်ပစ်နိုင်လိုက်သည်။
ဤအတွေ့အကြုံဖြင့် သူသည် စစ်မှန်သောစွမ်းအင်ကို ထိန်းချုပ်ရာတွင် ပိုမိုကျွမ်းကျင်လာသည်။
ယနေ့အထိ သူသည် အဆင့်၅ အကောင်ကြီး နှစ်ကောင်နှင့် ဆက်တိုက် ကြုံတွေ့ရပြီး လေ့ကျင့်လေလေ စစ်မှန်သော စွမ်းအင်ကို ထိန်းချုပ်နိုင်လေ အားကောင်းလေဖြစ်သည်။ သူ၏ လှုပ်ရှားမှုများကို ပို၍ ကျွမ်းကျင်လေလေ ဖြစ်ပြီး နဂါးဆင်ရွှေလက်ဝါး၏ ပထမအဆင့်ကို ပြီးပြည့်စုံစေခဲ့၏။
၎င်းသည် ပထမအဆင့် ဖြစ်သော်လည်း ပြီးပြည့်စုံသော အခြေအနေသို့ ရောက်ရှိသောအခါ ၎င်း၏ စွမ်းအားသည် အဆများစွာ တိုးလာလိမ့်မည်။ အဆင့်၅ သားရဲကြီးသည် ပြင်းထန်သည်။
